一開始睇《鬼滅之刃》係因為有light worker介紹，話呢套卡通有好多靈性message喺入面，到最後果然有唔少得著：

1. 主角炭治郞係一個能力高強嘅鬼殺隊成員，但佢無因此而自大自滿，相反仲好謙卑去接受其他人嘅教導、識得欣賞其他隊友嘅優點、利用各人嘅長處去合作完成任務，對比佢弱小嘅人總係溫柔鼓勵，永遠令身邊人感到溫暖。愛同温柔永遠係最大嘅力量。

2. 炭治郎嘅責任係要不停去捉鬼，防止佢地傷害人類。即使係咁，佢對鬼亦好有同理心，知道每一隻鬼都曾經係人類，只係因為種種可憐嘅原因而成為鬼。即使喺戰鬥途中都會尊重鬼、殺鬼後亦會替佢地難過。

3. 動畫入面有提過最重要嘅係呼吸法，整頓好自己嘅呼吸就係提昇殺鬼能力嘅方法。令我諗起冥想係靈修嘅入門一樣，一件睇起上嚟好簡單嘅事，回歸基礎、持續練習、做得好可以有好強大嘅威力。

4. 善逸表面上係一個好細膽、好無自信、好弱嘅武士，而佢識嘅招式亦只係得一套 - 「雷之呼吸」，本來佢覺得自己只識得一樣野好渣，但係當佢將呢招運用到最極致嘅時候，威力並唔比其他殺鬼隊成員差。每個人都有佢自己嘅長處，那怕只有一件事，只要將佢發揮到最好就足夠。

發現日本動畫/日劇往往都係好高質素，唔係得個「好睇」，而係好睇得黎有深度、唔會將道理明言，但睇過後往往好有得著，亦令人感覺到溫暖。